#21 - 眼耳口鼻人

日期:12/3/2016

天氣又突然冷了,但大家依然精神奕奕,尤其係桂暖,佢一早起身去做運動,然後去碗磘擇野菜,再去社區中心,然後十點準時嚟到上堂,真係好有活力!

我哋今日畫人像。不經不覺已經第二十二堂,我哋畫過風景、花草、動物,就係未畫過人。於是今日就挑戰高難度,一齊畫人。

我帶咗畢加索同馬蒂斯嘅書做參考,想話比大家聽,畫畫唔一定要似,希望大家放開啲,開心畫就得啦。

結果,完全意想不到地有趣!每個人用本身嘅風格畫人,畫出獨一無二嘅作品。

梁蘇用粉彩臨畢加索,畫出一位有韻味嘅女士;艷蘭同杏芳用本身嘅風格理解人像,用顏色同點點畫咗一幅玩味十足嘅畫;精力充沛嘅桂暖同鳯琼用唔同嘅色塊拼湊人臉,畫得抽象派畫家嘅精粹;銀花同貴珍起初有點不知所措,但慢慢越畫越放開,銀花更畫咗張雙臉人,真係估唔到佢嘅創意!

途中,有新同學加入,叫綺華,雖然第一堂唔夠膽畫,但希望佢之後會多啲嚟,一齊玩!