#18 - 最緊要利利事事

日期 : 30/1/2016

恭喜發財!長者們派過咁年利事,應該從來無試過自己設計利事封。今日我哋就一齊畫利事封。

 因為我哋用一啲現成嘅利事封作為參考教材,有長者可愛到連公司名都抄埋落幅畫到,全班一齊大笑。

鳳琼用佢一向鐘情嘅藍色畫竹,象徵竹報平安。桂暖用佢一向細膩嘅筆觸畫咗一棵桃花樹,樹幹粗實,生長得非常健康; 艷蘭、杏芳同陳嬌用各自獨特嘅風格演繹利事封,通過唔同顏色同形狀祝賀新禧。

大家都懷住開心嘅心情設計利事,希望下年可以真係將佢哋嘅設計變成真嘅利事,等佢哋可以用自己嘅畫派比人,更有意義咁迎接新年!